Clwb Hwyl Hwyr

PARTION NADOLIG

2010-12-21T12:42:00.000-08:00

Nos Wener 4ydd Rhagfyr cafodd aelodau Ysgol uwchradd Clwb Hwyl Hwyr eu parti Nadolig.

Parti pyjamas oedd hwn gyda bwyd o Caffi Celias. Roedd y bobl ifanc wedi dewis o Chow Bocs “sweet and sour” neu “ribs”.

Roedd yn rhaid bwyta gyda chop sticks a cafwyd noson arbennig. Wedi’r bwyta roedd cyfle i chwarae gemau “twister”, taflu pel i mewn i fwcedi a shove ha’penny.

Ar y nos Wener canlynol cynhlaiwyd Parti Nadolig yr aelodau Ysgol Cynradd. Y tro hwn selsig a sglodion oedd y bwyd.

Cafodd pawb arian ffug i gyfnewid am eu anhrhegion Nadolig. Yna chwaraewyd ychydig o gemau. Eto roedd yn noson llwyddiannus dros ben.

Clwb Cristnogol llawn hwyl yw Clwb Hwyl hwyr. Mae’r aelodau cynradd yn cwrdd yn wythnosol ar Nos Wener yn ystod tymhorau’r ysgol yn Neuadd Gellimanwydd, rhwng 5.30 a 6.30pm. Ac mae’r aelodau Uwchradd yn cyfarfod yn Fisol am 7.00pm.

Yn ystod y cyfnod hwn mae’r plant yn cael cyfle i fwynhau amrywiaeth o weithgareddau gan gynnwys gemau, stori, crefft, cystadlaethau ayyb. Mae’r clwb hefyd yn cymryd rhan yn flynyddol mewn cystadlaethau pêl droed a phêl rwyd yr Ysgolion Sul, a chystadleuaeth mabolgampau dan do.

Bydd y clwb yn ail ddechrau ar Nos Wener 14 Ionawr ar gyfer yr aelodau Cynradd ac ar 4 Chwefror ar gyfer yr aelodau Uwchradd.

PARTI NADOLIG

2010-12-07T05:34:00.000-08:00

Cynhaliwyd Parti Nadolig Clwb Hwyl Hwyr Uwchradd, Nos Wener 3ydd Rhagfyr.

Parti Pyjamas oedd gennym ac yna cawsom Chow Box yr un.

Noson llawn hwyl yn trio bwyta gyda Chop Sticks ac yna chwarae Twister ac ati.

Wythnos nesaf bydd parti'r Clwb Cynradd. Croeso cynnes i bawb.

Clwb Hwyl hwyr yn ail ddechrau - Tymor Nadolig 2010

2010-09-25T11:33:00.000-07:00

Mae Clwb Hwyl Hwyr wedi ail ddedchrau wedi seibiant dros yr haf. Ar Nos Wener, 24 Medi daeth Mr Nigel Davies, Swyddog Menter Ieuenctid Cristnogol (Mic) Sir Gaerfyrddin. Daeth criw da ynghyd i Neuadd Gellimanwydd i fwynhau’r noson.
Dechreuodd Mr Davies drwy adrodd hanes Gideon drwy gyfrwng Powerpoint a DVD. Yna chwaraewyd nifer o gemau cyffrous a gorffen drwy rannu poop a crisps. Roedd yn noson hwylus dros ben.
Clwb Cristnogol Cristnogol llawn hwyl ar gyfer disgyblion blynyddoedd 3 i 6 yw Clwb Hwyl Hwyr ac rydym yn cwrdd yn Neuadd Gellimanwydd bob Nos Wener yn ystod tymor yr ysgol.

Eleni hefyd rydym yn rhedeg Clwb yn arbennig ar gyfer plant ysgol uwchradd blynyddoedd 7-9 ar y Nos Wener cyntaf y mis. Y noson gyntaf oedd ar 1 Hydref pan cawsom Barti Pizza!

TYMOR Y NADOLIG 2010

2010-09-10T15:02:00.000-07:00

Bydd CLWB HWYL HWYR yn ail ddechrau yn Neuadd Gellimanwydd, Rhydaman ar Nos Wener 17 Medi am 5.30.

Clwb Ieuenctid Cristnogol llawn hwyl ar gyfer disgyblion blynyddoedd 3 i 6 yw Clwb Hwyl Hwyr.

Rydym yn cyfarfod yn wythnosol ar Nos Wener yn ystod tymhorau’r ysgol yn Neuadd Gellimanwydd, rhwng 5.30 a 6.30pm. Yn ystod y cyfnod hwn mae’r plant yn cael cyfle i fwynhau amrywiaeth o weithgareddau gan gynnwys gemau, stori, crefft, cystadlaethau ayyb.

’Does dim tâl aelodaeth, ond gwneir casgliad wythnosol – awgrymir 50c. – tuag at gronfa’r Clwb

Mae gennym dîm o wirfoddolwyr ymroddedig a phrofiadol yn gofalu am y plant ac mae yna groeso cynnes i bawb ymuno a ni.

TYMOR NEWYDD

2010-07-11T10:15:00.000-07:00

Mae'r tymor wedi dod i ben a byddwn yn ail ddechrau ym Mis Medi.

Edrych ymlaen i'ch gweld adeg hynny.

hwyl a joiwch yr haf.

CHWARAEON MENTER IEUENCTID CRISTNOGOL

2010-04-19T14:13:00.000-07:00

Llongyfarchiadau i aelodau Clwb hwyl hwyr ar ddod yn gyntaf yng nghystadleuthau Chwaraeon Menter Ieuenctid Cristonogol Sir Gar.
Daeth y tim Pelrwyd cyrnadd yn gyntaf a hefyd y tim Pelrwys Uwchradd.

da iawn chi .

Bu gwyliau’r Pasg yn gyfnod prysur i nifer o blant ac ieuenctid Ysgolion Sul a chlybiau Cristnogol Sir Gaerfyrddin wrth iddynt gymryd rhan mewn cystadlaethau pêl droed a phêl rwyd o dan drefniant M.I.C. Cynhaliwyd y cystadlaethau yn rhanbarthol yng Nghastell Newydd Emlyn a Rhydaman gyda’r rowndiau terfynol yn cymryd lle yng Nghaerfyrddin.

Rhannwyd y timoedd i grwpiau gan sicrhau bod pob tîm yn cael chwarae o leiaf dwy gêm yr un. Daeth tyrfaoedd da i gefnogi’r fenter a chafwyd cystadlu brwd ymysg y timoedd gyda phawb yn rhoi o’u gorau. Gwych oedd gweld y cyffro a’r llawenydd ar wynebau’r chwaraewyr a’u cefnogwyr wrth i bawb fwynhau “mas draw.” Diwrnodau penigamp felly i bawb, ac i’r sawl wnaeth ennill, wel roedd hynny yn fonws.

Roedd y canlyniadau fel a ganlyn:
Rowndiau Terfynol Y Sir - Yn y rowndiau terfynol a gynhaliwyd yng Nghaerfyrddin dyma oedd y canlyniadau:

Pêl Rwyd Cynradd: 1af – Clwb Hwyl Hwyr, Rhydaman.

Pêl Rwyd Uwchradd: 1af – Clwb Hwyl Hwyr, Rhydaman.

Llongyfarchiadau mawr i'r timoedd uchod ac i bawb wnaeth gymryd rhan a chyfrannu tuag at dri diwrnod llwyddiannus iawn i Ysgolion Sul a chlybiau Cristnogol sir Gaerfyrddin.

DIWEDD TYMOR

2010-04-03T01:33:00.000-07:00

Mae blwyddyn arall yn hanes y Clwb newydd ddod i ben.

Byddwn yn ail ddechrau yn y flwyddyn addysgol newydd, sef Mis Medi.

Hoffai Swyddogion Clwb Hwyl Hwyr ddymuno'n dda i'r holl aelodau dros yr haf ac edrychwn ymlaen i'ch gweld eto Mis Medi.

hwyl

Edwyn a'r criw

PYTHEFNOS MASNACH DEG

2010-03-08T06:44:00.000-08:00

Roedd aelodau'r clwb yn cymryd rhan y y Banana Split enfawr yn yr Arcade, Rhydaman ar Nos Wener 5 Mawrth. Rhan o ddigwyddiadau Pythefnos Masnach Deg oedd hon. Dyma'r ail waith i ni adeiladu Banana Split enfawr ar hyd yr arcade ac roedd un eleni yr un mor fawr a llynedd.

Yn gyntaf roedd angen torri'r bananas a'u gosod ar y cafn, wedyn ychwanegu'r hufen ia, yr hufen a'r saws siocled - wedi hyn roedd pawb yn gafael mewn llwy a bwyta!!

Pa well ffordd i ddathlu Pythefnos Masnach Deg ac ar yr un pryd codi ymwybyddiaeth am nwyddau sy'n rhoi cyfle teilwng i'r ffermwyr a'r masnachwyr.

TYMOR Y GWANWYN

2010-01-18T13:21:00.000-08:00

Mae'r Clwb wedi ail ddechrau ar ol y tywydd garw.

Dewch draw i neuadd Gellimawydd ar Nos Wener am 5.30 i gael hwyl.

TYMOR Y GWANWYN

2009-12-15T01:29:00.000-08:00

Mae'r clwb wedi gorffen am y tymor. Byddwn yn ail ddechrau ar Nos Wener 8 Ionawr 2010 yn Neuadd Gellimanwydd am 5.30.

Croeso cynnes i bawb.

2009-12-15T01:26:00.000-08:00

NADOLIG LLAWEN A BLWYDDYN NEWYDD DDA

I HOLL AELODAU A FFRINDIAU

CLWB HWYL HWYR

PARTI NADOLIG

2009-12-10T11:26:00.000-08:00

Mae Parti Nadolig Clwb Hwyl Hwyr ar Nos Wener, 11 Rhagfyr yn Neuadd Gellimanwydd.

Bydd pawb yn cael hwyl arbennig drwy chwarae gemau, prynu anrhegion (bydd pob plentyn yn cael gwerth 40 pwynt i wario ar wahanol bethau) a bwyd blasus.

Felly cofiwch ddod draw i ymuno yn y dathlu.

Cwis Beiblaidd

2009-12-01T12:04:00.000-08:00

Ym mis Medi eleni ffurfiwyd Menter Ieuenctid Cristnogol (M.I.C.) mewn ymateb i ddymuniad gan eglwysi anghydffurfiol sir Gaerfyrddin am gefnogaeth i ddatblygu gwaith ymhlith plant ac ieuenctid. Prif nod y Fenter newydd yw hybu tystiolaeth yr efengyl ymysg yr ifanc a hynny mewn ffyrdd cyfoes a pherthnasol ar gyfer ein hoes.

Yn ddiweddar, trefnwyd cwis Beiblaidd ar gyfer plant ac ieuenctid sir Gaerfyrddin gyda rowndiau rhagbrofol yn arwain fyny at rownd derfynol. Mewn cyfnod pan fod gwybodaeth Feiblaidd yn rhinwedd prin yn ein cymdeithas, mor wych oedd hi i weld plant a phobl ifanc ar draws yr ystod oedran o 6 i 17 oed yn cymryd rhan gyda brwdfrydedd. Defnyddiwyd yr offer diweddara gan gynnwys PowerPoint, bysyrs electronig a meicroffonau gan roi delwedd broffesiynol a chyfoes i’r achlysur.

Yn y rownd derfynol trefnwyd y cwis ar ffurf y rhaglen deledu boblogaidd, “Who Wants To Be A Millionaire?” Cafwyd cystadleuaeth ddifyr a hynod o gyffrous, heb sôn am y tensiwn, wrth i rai timoedd gyrraedd lefel uchel ac wrth i’r ffôn symudol gael ei ddefnyddio i ymgynghori gyda nifer i ffrind.

Y Rownd Derfynol
Yn cymryd rhan yn y rownd derfynol oed cynradd oedd:
Providence, Llangadog (Dwyrain sir Gâr)
Clwb Hwyl Hwyr, Rhydaman (Dwyrain sir Gâr)
Clwb Plant Y Brenin, Caerfyrddin (Gorllewin sir Gâr)
Ysgol Sul Hermon (Gorllewin sir Gâr)

Yn cymryd rhan yn y rownd derfynol oed uwchradd oedd:
Calfaria, Penygroes (Dwyrain sir Gâr)
Clwb Hwyl Hwyr, Rhydaman (Dwyrain sir Gâr)
Penuel, Caerfyrddin (Gorllewin sir Gâr)
Y Babell, Pensarn (Gorllewin sir Gâr)

Cael hwyl wrth gymryd rhan oedd y peth mawr, ond yn sgìl hynny, mae`n amlwg bod y plant a’r bobl ifanc wedi dysgu llawer, a gobeithio magu blas tuag at Air Duw. Daeth Tîm Uwchradd Clwb hwyl hwyr yn ail yn y rownd derfynol.

TYMOR NADOLIG

2009-10-20T10:04:00.000-07:00

Mae'r Clwb yn mynd o nerth i nerth gyda aelodau newydd a llawer o rhai flwyddyn diwethaf wedi ail ymuno. Mae gennym Swyddogion, sef disgyblion Blwyddyn 7 yr Ysgol uwchradd sy'n ein cynorthwyo gyda'r gemau.

Dewch draw i ymuno yn yr hwyl a'r sbri.

2009-09-16T15:09:00.000-07:00

TYMOR NEWYDD YN DECHRAU

2009-09-16T15:05:00.000-07:00

Bydd Clwb Hwyl Hwyr yn ail ddechrau wedi seibiant dros yr haf ar Nos Wener 25 Medi yn Neuadd Gellimanwydd am 5.30

Croeso Cynnes i Bawb.

Menter Ieuenctid Cristnogol (Sir Gâr)

2009-08-25T15:24:00.000-07:00

Mae Clwb Hwyl Hwyr wedi ymaelodi a MIC, sef :-

Menter newydd sy’n darparu ar gyfer plant ac ieuenctid wedi eu sefydlu gan eglwysi anghydffurfiol sir Gaerfyrddin. O fis Medi ymlaen bydd Menter Ieuenctid Cristnogol (M.I.C.) yn trefnu gweithgareddau ac yn darparu adnoddau a chefnogaeth i eglwysi yn eu cenhadaeth ymhlith plant a phobl ifanc. Y person sydd wedi ei benodi i arwain y gwaith yw Mr Nigel Davies.

Bu Nigel yn Bennaeth Adran Addysg Grefyddol ym Mhorth Tywyn am 5 mlynedd cyn iddo symud i weithio gyda Chyngor Ysgolion Sul Cymru, a chofiwn ei waith arbennig yno am 17 mlynedd. Am y tair blynedd diwethaf bu’n swyddog plant/ieuenctid gyda Menter Cydenwadol Gogledd Myrddin. Bu’n fawr ei barch gyda’r Fenter ac mae wedi ymdrechu, gyda llwyddiant clodwiw, i godi proffil yr Ysgol Sul, ac wedi llafurio yn ddi-baid i rannu’r Newyddion Da mewn amrywiol ffyrdd ymhlith plant ac ieuenctid. Y mae rhestr yr hyn a gyflawnwyd yn rhy fawr i`w cynnwys yma ond wrth i’r gwaith ymestyn ar draws sir Gaerfyrddin bydd cyfle i bob eglwys ac enwad elwa o’r hyn fydd gan M.I.C. i’w gynnig.

Prif nod M.I.C. bydd hybu gwaith a thystiolaeth yr efengyl ymhlith plant ac ieuenctid y sir a hynny mewn ffyrdd cyfoes a pherthnasol ar gyfer ein hoes. Bydd amrywiaeth o weithgareddau llawn hwyl a chyffro yn cael eu trefnu gan gynnwys digwyddiadau cymdeithasol fel cystadlaethau pêl droed, pêl rwyd a mabolgampau yn ogystal â digwyddiadau fel Bwrlwm Bro, gwersylloedd ac oedfaon cyfoes fydd yn cymell yr ifanc i ystyried galwad Duw ar eu bywyd. Bydd y Fenter yn ymdrechu i gyfleu i’r ifanc y gred bod Cristnogaeth yn ymwneud a phob agwedd o fywyd ac nid yn unig mynychu oedfaon ar y Sul.
Mae gwahoddiad agored i gapel / eglwys o unrhyw enwad o fewn sir Gaerfyrddin i berthyn i’r Fenter. Bydd yr eglwysi hynny sy’n cofrestru yn cael gwybodaeth gyson am bob digwyddiad fydd yn cael ei drefnu a byddant yn medru elwa o gefnogaeth bersonol yn eu sefyllfa leol. Mewn amgylchiadau ble mae yna eglwysi heb blant nac ieuenctid, mae gwahoddiad iddynt ymuno â M.I.C. fel aelodau cyswllt. Byddant yn derbyn Llythyr Newyddion / Gweddi tair gwaith y flwyddyn yn cynnwys lluniau a chrynodeb o’r hyn sydd wedi cymryd lle a manylion am ddigwyddiadau sydd i ddod gyda chyfle i weddïo dros y gweithgareddau hynny.

Mae pwyllgor llywio cydenwadol wedi ei ffurfio i gefnogi’r gwaith. Y cadeirydd yw Y Parchg Tom Defis (Cymorth Cristnogol) a’r ysgrifennydd yw Y Parchg Eurof Richards (Pont-henri). Mewn dyddiau pan fod Cristnogaeth ar drai yn ein gwlad a nifer yr ieuenctid sy’n mynychu capel ac eglwys yn brin, dyma gyfle delfrydol i eglwysi i ymateb i’r her sy’n eu hwynebu trwy fuddsoddi mewn cenhadaeth gartref. Mae M.I.C. yn bodoli er lles plant ac ieuenctid sir Gâr ac i gydweithio gyda’r eglwysi er mwyn i bobl ifanc yr oes hon gael y cyfle i glywed ac i ymateb i wahoddiad efengyl yr Arglwydd Iesu Grist.

TYMOR Y CLWB

2009-06-13T16:09:00.000-07:00

Mae'r Clwb wedi gorffen am yr haf a byddwn yn ail ddechrau yn Mis Medi.

Mae arweinyddion a swyddogion Clwb Hwyl Hwyr yn dymuno'n dda i bawb dros cyfnod gwyliau'r haf ac yn edrych ymlaen i'ch gweld unwaith eto yn Medi.

BARBECIW

2009-05-25T07:02:00.000-07:00

Mae blwyddyn gyntaf Clwb Hwyl Hwyr, sef menter ieuenctid capeli Cymraeg Rhydaman, wedi bod yn lwyddiant ysgubol.

I orffen y tymor cawsom farbeciw yn Neuadd Gellimanwydd. Roedd criw da iawn wedi troi i fyny ar gyfer ein noson olaf.

Dechreuwyd drwy chwarae ychydig o beldroed. Yna dosbarthwyd arian ffug i bawb er wmyn iddynt ddewis eu anrheg am fod yn aelod o'r clwb. Roedd pawb yn cael gwerth 25 pwynt yt un. Roedd amrywiaeth o ddewisiadau ar gael , gan gynnwys digon o losin.

Graham Daniels oed dyn gyfrifol am y barbeciw - cawsom byrger, sosej, kebab a digon o sos coch. Yn bwdin roedd dewis o wahanol gateaux a hufen neu hufen ia.

Wedi hyn manteisiodd llawer ar y cyfle i dostio marshmallows - diolch i Manon Daniels am oruchwylio hyn.

Bydd blwyddyn newydd y Clwb yn ail ddechrau ym mis Medi.

NOSON RUTH

2009-05-16T07:10:00.000-07:00

Ruth oedd testun y stori yng Nghlwb Hwyl Hwyr nos Wener 15 Mai. Roedd criw da wedi dod i'r neuadd ar gyfer y noson.

Edwyn oedd yr arweinydd. Cawsom hanes Ruth fel stori'r noson. Yna gan barhau a'r thema o gasglu grawn ar gyfer bwyd rhanwyd pawb i ddau dim ar gyfer gem gwneud brechdan. Un o'r gemau oedd gwneud a bwyta brechdan Jam neu Nutella a'i bwyta.

Roedd angen i bob aelod o'r tim redeg at y bwrdd, gwneud brechdan a'i bwtya cyn i'r aelod nesaf gael rhedeg i wneud un arall.

Bydd y clwb yn gorffen wythnos nesaf gyda Barbeciw tu allan i Neuadd Gellimanwydd.

CHWARAEON

2009-04-14T10:00:00.000-07:00

Ar Ebrill 8fed yng Nghanolfan Hamdden Rhydaman cynhaliwyd cystadlaethau chwaraeon pêl droed a phêl rwyd Menter Cyd-enwadol Gogledd Myrddin.

Roedd aelodau'r Clwb yn cystadlu a braf yw cael dweud y cawsom gryn lwyddiant. Gwnaeth timau peldroed cynradd ac Uwchradd a timau pelrwyd gystadlu yn frwd iawn. Daeth tim Pelrwyd Cynradd Clwb Hwyl Hwyr (A) yn fuddugol. Yn ogystal roedd aelodau o'r Clwb yn rhan o dim Peldroed Uwchradd Egwlysi Cylch Aman a ddaeth yn ail i Saron yn y rownd derfynol.

Roedd y Ganolfan yn fwrlwm o weithgaredd trwy'r dydd ac unwaith eto braf yw gweld cymaint o'n hieuenctid yn cael hwyl aruthrol mewn awyrgylch saff a christnogol.

CHWARAEON - YMARFER

2009-04-04T07:43:00.000-07:00

Nos Wener, 3 Ebrill aeth aelodau Clwb Hwyl Hwyr i Ganolfan Chwaraeon Rhydaman i ymarfer ar gyfer y cystadleuathau chwaraeon sydd i'w cynnal wythnos nesaf. Manon Daniels oedd yn hyfforddi y tim pel-rwyd a trystan Daniels y tim peldroed. Mae Trystan a Manon ymhlith yr ieuenctid sydd yn cynorthwyo'r arweinyddion yn y clwb. Mae Menter Cyd-enwadol Ggledd Myrddin yn cynnal cystadleuthau peldroed a phel-rwyd dydd Mercher 8 Ebrill yng Nghanolfan Hamdden Rhydaman. Bydd gan Clwb Hwyl hwyr dimau yn cystadlu yn y ddau - peldroed a pel rwyd. Felly aethom i ymarfer yn y cyrtiau allanol yn y Ganolfan.

Roedd pawb wedi mwynhau ac yn edrych ymlaen ar gyfer y cystadlu dydd Mercher.

FUNTASIA

2009-03-31T14:52:00.000-07:00

Ar ddiwedd mis Mawrth i gloi gwerthgareddau'r tymor cafodd aelodau Clwb Hwyl Hwyr Rhydaman barti mawr yn lle chwarae Funtasia yng Nghapel Hendre. Fe ddaeth bron i 20 o aelodau i’r parti ac fe fuodd y plant yn sglefrio, chwarae a mwynhau pryd o fwyd. Fel y gwelir yn amlwg o’r lluniau fe wnaeth pawb fwynhau yn fawr iawn.

LOGO NEWYDD

2009-03-30T14:28:00.000-07:00

Mae gan y clwb logo newydd. Pa well ffordd na chael y plant eu hunain i gynllunio'r logo. Felly ar nos Wener 13 Mawrth yn ystod noson grefft yng ngofal Catrin cynlluniwyd y logo gan y plant sydd i'w weld uchod.

FUNTASIA

2009-03-16T15:26:00.000-07:00

Ydych chi am ddod i Funtasia gyda ni. Os ydych am ddod yna rhowch eich ffurflen i mewn i un o'r Arweinwyr erbyn dydd Gwener 20 Mawrth.

Byddwn yn mynd i Funtasia, Capel Hendre ar 27 mawrth am 5.30 - 7.00pm

Yna yr wythnos ganlynol byddwn yn cau'r clwb am y Pasg ac yn ail agor wedi'r gwyliau.

hwyl
Edwyn

BANANA SPLIT MASNACH DEG

2009-03-06T15:08:00.000-08:00

Nos Wener 6ed Mawrth aeth aelodau Clwb hwyl hwyr i'r Arcade yn Rhydaman i gymryd rhan yn y Banana Split Enfawr.

Ymgais i greu record byd o ran bwyta bananas masnach deg oedd hon.

Yn gyntaf roedd yn rhaid adeiladu'r banana split drwy dorri bananas, wedyn rhoi'r hufen ia ar eu pennau. Yna ychwanegu'r hufen ac yn olaf y saws mefus a siocled. Roedd y canlyniad yn gampwaith ac yn wir cadw at y term Banana Split Enfawr.

Braf oedd gweld cymaint yno, yn blant, ieuenctid ac oedolion.

Roedd y gweithgaredd hwn wedi ei drefnu gan glybiau ieuenctid capeli ac eglwysi'r dref, ond yn agored i bawb. Roedd y banana split yn barod i'w bwyta am 6.00 a cafodd pawb hwyl arbennig yn llanw eu boliau.

Pa well ffordd o godi ymwybyddiaeth Masnach Deg sy'n ceisio sicrhau bywolaieth deilwng i gynhyrchwyr y trydydd byd, a chael hwyl arbennig yr un pryd.

BANANA SPLIT ENFAWR

2009-03-03T14:59:00.000-08:00

Nos Wener 6 Mawrth 2009 bydd aelodau ac arweinwyr Clwb Hwyl Hwyr yn cymryd rhan mewn gweithgaredd Banana Split Enfawr i ddathlu Wythnos Masnach Deg yn Rhydaman.
Byddwn yn ymgynull yn yr Arcade am 6.00 pan fydd Banana Split Enfawr yn cael ei greu ac yna yn well fyth yn cael ei fwyta.
Rhan o gynnig Sefydliad Masnach Deg i greu record byd am fwyta'r nifer mwyaf o fananas masnach deg mewn 24 awr yw hwn. (o hanner dydd Gwener y 6ed i hanner dydd Sadwrn y 7ed).

Mae'r Banana Split yn cael ei drefnu gan glybiau ieuenctid Capeli Rhydaman, ond yna gored i bawb. Dewch i'r Arcade am 6.00 gyda llwy!

Rhaglen Tymor y Pasg

2009-02-22T15:36:00.000-08:00

Dyddiad, Stori, Arweinydd
27/2/09 Atgyfodiad Lasarus, Graham

6/3/09 Wythnos Masnach Deg - Banana Split enfawr yn yr Arcade

13/3/09 Crefft, Catrin

20/3/09 Pedr Yn Gwadu, Dyfrig

27/3/09 Parti’r Clwb yn Funtasia, Pawb

3/4/09 Y Croesholiad/ Atgyfodiad, Edwyn

TYMOR Y GWANWYN 2009

2009-01-16T02:32:00.000-08:00

Mae'r tymor newydd wedi dechrau. Ar nos Wener 5 Ionawr Y Parchg Emyr Gwyn Evans oedd yn agor gweithgareddau'r tymor.
Mae rhaglen arbennig wedi ei threfnu ar ein cyfer, gan gynnwys trip i orffen y tymor i sglefrio yng Nghapel Hendre.

Dyma restr o'r dyddiadau ;

Dyddiad Prif Sesiwn Arweinydd

9/1/09 Porthi`r 5000, Emyr

16/1/09 Sacheus, Catrin

23/1/09 Y Barnwr a`r Weddw, Graham

30/1/09 Y Mab Colledig, Dyfrig

6/2/09 Crefft, Edwyn

13/2/09 Iachau Merch Jairus, Emyr

20/2/09 Hanner Tymor

PARTI NADOLIG

2009-01-16T02:29:00.000-08:00

Ar ddiwedd tymor cyntaf Clwb Hwyl Hwyr cawsom barti Nadolig bel cafodd y plant gyfle i ddewis eu anrhegion eu hunain. Roedd pawb yn gallu cerdded o amgylch y byrddau adewis pa anrehgion oedd yn eu plesio. Wedi hyn cawsom gemau ac yna i orffen pop a chrisps.

Mae pawb yn edrych ymlaen at tymor nesaf yn barod.

Noson Grefftau

2008-10-24T14:15:00.000-07:00

Nos Wener 24 Hydref daeth criw Clwb Hwyl Hwyr i Neuadd Gellimanwydd ar gyfer noson grefftau. Cawsom hwyl arbennig yn creu ci cardfwrdd, dafad yn nodi ei ben, tylluan allan o 4 calon a gemau papur.

Edwyn oedd yn gyfrifol am y noson gyda Hanna Wyn, a'r Parchg Emyr Wyn Evans yn ei gynorthwyo.

Ni fydd clwb wythnos nesa oherwydd hanner tymor ond edrychwn ymlaen i'r wythnos ganlynol i ail gydio yn yr hwyl a hynny trwy ddysgu am fywyd, a chyfle i addoli, Iesu.

Clwb Mis Hydref

2008-10-13T07:31:00.000-07:00

Mae'r clwb yn mynd o nerth i nert. Braf yw gweld cymaint o blant yn dod draw i'r Neuadd ar nos Wener. Wythnois diwethaf roedd Catrin yn rhoi hanes "Y Pechod Cyntaf" i ni. Yna cawsom hwyl arbennig yn chwarae gemau.
Nos Wener diwethaf cawsom "Hanes Noa" gan Graham. Wedyn roedden ni i gyd yn chwarae gemau a ceisio sgorio drwy gael y balwn i fewn i'r gol.

Mae tua 20 ohonom yn dod i'r neuadd - beth am ymuno yn yr hwyl.

Noson Gyntaf

2008-09-20T10:50:00.000-07:00

Nos Wener, Medi 19 daeth 20 o blant i Neuadd Gellimanwydd, Rhydaman ar gyfer noson gyntaf Clwb hwyl hwyr.
Yn gyntaf cawsom stori - Y Creu - gan Edwyn. Yna rhanwyd pawb i dri tim - "lightening", tigers a zebras" a "bananas pinc" i chwarae gemau.
Roedd yn noson hynod hwylus gyda pawb wedi mwynhau yn fawr. hwyl arbennig oedd rhedeg i nol y peli bach a dod a nhw yn ol i'r pen i weld pwy oedd wedi casglu fwyaf.

Dewch yn llu i'r noson nesaf Nos Wener, Medi 26, yn Neuadd Gellimanwydd am 5.30 - 6.30

Y LANSIAD

2008-09-13T00:20:00.001-07:00

Nos Wener, 12 Medi oedd noson lansiad Clwb Hwyl Hwyr yn Neuadd Gellimanwydd, Rhydaman. Braf oedd gweld cymaint o blant a rhieni yn bresennol. Cawsom gwmni Rosfa y consuriwr, sef y Parchg Eirian Wyn.

Roedd Rosfa ar ei orau yn dangos i'r plant mawr a bach wahanol driciau hud a lledrith, ac yn ogystal roedd yn defnyddio nifer o'r plant i'w gynorthwyo. Roedd angen gair hud arbennig i wneud i'r "magic" weithio -Y gair hud oedd inky winki Pww!

Diolch i bawb am wneud y noson yn llwyddiant ysgubol.

Clwb Cristnogol llawn hwyl ar gyfer disgyblion blynyddoedd 3 i 6 yw Clwb Hwyl Hwyr, sydd wedi ei drefnu gan Gapeli tref Rhydaman dan arweiniad Menter Cydenwadol Gogledd Myrddin.

Rydym yn cyfarfod yn wythnosol ar Nos Wener yn ystod tymhorau’r ysgol yn Neuadd Gellimanwydd, Rhydaman rhwng 5.30 a 6.30pm. Yn ystod y cyfnod hwn mae’r plant yn cael cyfle i fwynhau amrywiaeth o weithgareddau gan gynnwys gemau, stori, crefft, cystadlaethau ayyb. ’Does dim tâl aelodaeth, ond gwneir casgliad wythnosol – awgrymir 50c. – tuag at gronfa’r Clwb

Mae gennym dîm o wirfoddolwyr ymroddedig a phrofiadol yn gofalu am y plant ac mae yna groeso cynnes i bawb ymuno â ni. Mewn cyfnod sy’n llawn o beryglon ac atyniadau amheus, dyma gyfle gwych i blant gyfarfod â’i gilydd, a mwynhau hwyl a sbri mewn awyrgylch ddiogel a Christnogol.

Lansiad

2008-09-07T08:04:00.001-07:00

Dewch i Lansiad Clwb Hwyl Hwyr

Croeso Cynnes i Bawb